aragonés

¡No a os retalles imposaus dende o gubierno d’o PP!

Os diferents movimientos estudiantils d’as diferents nacions oprimidas aintro d’o Estau espanyol que hemos sinyau iste manifiesto, queremos dar a conoixer a l’opinión publica o nuestro mas amplo refuse a os nuevos retalles que s’han planteyau dende o gubierno de Mariano Rajoy, y mas que mas por os retalles en educación planteyaus por Wert.

D’a mesma traza, nos fería goi incidir en que todas istas midas se fan plegar con l’aduya d’os diferents gubiernos d’as comunidatz autonomas y forals, eludindo as suyas responsabilidatz. Son fendo servir as decisions d’o gubierno central sin parar cuenta de cosa, amostrando una vegada mas que baixo lo capitalismo y l’autonomismo no ye posible a soberanía y a independencia d’os pueblos que se troban indefensos debant d’as retalladas imposadas dende l’UE y o gran capital. En ista coyuntura politica, as organizacions estudiantils y chovenils que empentamos iste comunicau hemos feito un poder politico ta poder estar a l’altura d’istos tiempos, y poder creyar una alternativa reyal a o capitalismo depredador que nos imposan y presentan como l’unica alternativa. Nusatras proposamos una alternativa socialista y independentista, an o poder economico y politico siga en o pueblo. Do no siga posible estricallar fuents de riqueza colectiva como l’educación y a sanidat.

Retalles, reformas y mermas de dreitos socials, politicos y culturals, son o diya par d’atro de todas as estudiants d’os nuestros pueblos. Con a sincusa d’una crisi, creyada por os mesmos que son chestionando o poder dende os diferents estamentos gubernamentals, nos son levando a un sistema esclavista, an os ricos son mas ricos y os pobres son mas pobres; an os nuevos faraons tien nombres de multinacionals, y que a traviés d’o total alcuerdo d’os gubernants y a patronal continan fatigando a ixa clase oprimida a traviés d’os trallons que son as fuerzas represivas de l’Estau.

Ya ye prou d’a mala situación d’as luengas y culturas d’os pueblos, soque agora escan esboldregar-las retallando os presupuestos en educación, cultura y en l’amillora d’a situación lingüistica. Con a crisi institucional, no han perdiu o tiempo en prebar d’uniformar as nacions aintro de l’estau, ta que a suya eslanguida estructura pueda continar existindo.

Chustifican tot isto dicindo que no bi ha diners, quan en os mercaus d’alta gama o creiximiento ha puyau, mientres que puya o gasto melitar y quan os chornals d’os politicos puyan tamién sin garra problema. Cada vegada veyemos en as escuelas mas camaras y mas personal de seguridat privada, a o mesmo tiempo que tenemos que sentir que cal puyar o numero d’estudiants por clase y que os profesors han d’eixercer mas horas lectivas; no i ha persona que no pueda veyer istas esferras.

Son muitas anyadas dende que precipiemos a charrar arredol d’a privatización d’a universidat, y no son guaires os trucazos que hemos recibiu dende que escomencipió a luita contra o proceso de Bolonia. Antis nos clamaban barrenaus y extremistas, agora no i hai rector que pueda rebatir, de rebesada, a dirección que ha preniu a universidat, con l’aprebación de cada uno d’ells. De todas trazas, ya que no tenemos cosa que perder, nomás bi ha que dicir que nos queda tot por ganar! Ye l’hora de prener un modelo de sociedat chusto y igualitario, an o poder siga de verdat en o pueblo.

Con tot y con ixo, veyemos como l’unica surtida eixercer a soberanía de cada pueblo. Ixa soberanía que nos fa estar suchetos en totz os procesos y no meros obchetos de compra y venda, y estar condenaus ta cutio por istos acontecimientos. Diya par d’atro dende cada centro educativo hemos de luitar contra cada mida imposada dende o gubierno y escar as alternativas necesarias t’aconseguir os nuestros obchetivos. Chuntando-nos a las luitas por una educación publica y de calidat ta todas y totz, ta poder construyir a nueva escuela que nos eduque como personas libres y iguals. Nomás estando suchetos activos d’os procesos educativos seremos capables de construyir atra mena d’escuela y sociedat.

En iste camín, l’unica alternativa posible ye una escuela publica, laica, popular, antipatriarcal, de calidat y que cumpla con todas as necesidatz lingüisticas y culturals de cada nación. En ixas envueltas, convidamos a toda l’estudiantalla d’as respectives nacions ta que barallen en iste cambio chunto a nusatras. Somos duenyas d’o nuestro present y tien que estar o nuestro compromís, ta construyir o nuestro esdevenidero, ¡Ye tiempo de luitar! ¡Con a luita estudiantil lo aconseguiremos!

 

¡Dica la victoria siempre!